HATAW! D'yaryo ng Bayan hatawtabloid.com
TINATAYANG nagkakahalaga ng P4 milyon ang nasabat na shabu sa da-lawang lalaki sa Brgy. Salvacion, La Loma, Quezon City.
Nakarekober ang QC Police District Anti-Illegal Drugs ng 15 maliliit na supot ng hinihinalang shabu na aabot sa isang kilo mula sa dalawang sakay ng Corolla Altis sa Don Manuel kanto ng Calavite Street.
Nagkaroon ng habulan bago tuluyang naharang ang kotse na may conduction sticker na YD 1179 habang sa temporary plate nito ay may sticker ng Philippine Army.
Kasama rin sa narekober ang P200,000 cash na marked money.
Kinilala ang isa sa mga nadakip na si Alemar Soliman, 25-anyos, batay sa kanyang driver’s license, habang itinago sa alyas Buknoy ang 15-anyos niyang kasabwat sa illegal na operasyon.
Tubong Marawi City ang mga suspek ngunit nakatira sa Quiapo, Maynila.
Ayon kay QC Police Director Sr. Supt. Joel Pagdilao, may babagsakan ng shabu ang mga suspek sa La Loma kaya nagkasa ng operasyon.
Ang pagsalakay ay follow-up operations aniya sa pagkakahuli sa isang pulis-Rodriguez, Rizal sa North Fairview, Quezon City nitong Lunes ng madaling-araw.
Ang pulis ang sinasabing distributor ng shabu sa Fairview area.
Jethro Sinocruz
