HATAW! D'yaryo ng Bayan hatawtabloid.com
ANG mga katolikong bansa tulad ng Pilipinas ay nagdaraos ng “Araw Ng Mga Patay” tuwing ika-1 ng Nobyembre. Ito ang araw ng paggunita natin sa mga mahal sa buhay na dinadalaw natin sa kanilang himlayan.
Naniniwala si Mader Ricky Reyes na isa rin itong pagkakataon para ang mga kababaiha’y magsikap na magkaroon ng pagbabago sa larangan ng kagandahan. “Dahil parang reunion na rin ito ng mga magkakamag-anak, dapat ay maipakita ang isang bagong anyo…isang bagong ikaw,” sabi ni Mader Ricky.
Mapapanood sa Gandang Ricky Reyes Todo Na Toh (GRR TNT) na prodyus ng ScriptoVisionngayong Sabado sa GMA News TV ang gagawing Make Over Magic ni Mader sa aktres na siLilia Cantapay na madalas na papel sa pelikula’y aswang o manananggal. ”Magugulat kayo sa resulta ng ginawa kong pagpapaganda sa kanya. May itinatagong byuti ang bruha. Masasabi n’yong, ‘ang ganda ng Lolah ko’,” sabi ng beauty guru at host ng GRR TNT.
Kung walang ibang gagawin sa panahong sem break, maaaring mag-aral ng “Nail Art.” May demo nito sa programa at patutunayan ng mga beautician ng Gandang Ricky Reyes Salon kung gaano kadali itong gawin.
Sa mga mahilig sa “food with a twist” o putaheng kakaiba sa ordinaryo’y samahan si Mader sa isang kainang ang especialty ay lamang-loob ng hayop (puso, atay, bato, bituka, balumbalunan, atbp). Sikat ito sa masasarap na pagkain tulad ng dinuguan, papaitan at bopis.
Samahan si Mader tuwing Sabado para sa isang oras ng kasiyahan at isyu tungkol sa kagandahan, kalusugan, at kabuhayan.
