HATAW! D'yaryo ng Bayan hatawtabloid.com
HINDI lamang magaling na aktres si Diana Zubiri, kundi marunong din siya sa buhay.
In fact, pati ang kahalagahan ng edukasyon ay alam niya kaya pinagsabay niya ang pag-aaral at ang kanyang showbiz career. Graduate si Diana sa Miriam College ng kursong Theater Arts.
Bukod sa nakapagtapos ng kolehiyo, may naipundar na rin siya sa buhay at may business pa. Ang dating Seiko Films star ay may dalawang bahay sa mga kilalang subdivision sa Manila at naipatayo rin niya ng tirahan ang kanyang pamilya sa probinsiya. May sarili rin siyang negosyo, ang Be Amazing Clothing na talaga namang nakakabilib ang ganda ng designs at quality ng mga jogging pants, jackets, sando, leggings, shorts, sports bra, harem pants, at iba pa.
Sa mga gustong bumili, i-text lamang o tawagan ang numerong 09081827140. Puwede ring bisitahin ang kanilang page sa Facebook, i-type lang ang Be Amazing upang makita ito.
Anyway, nang makahuntahan ko ang manager niya na si katotong Jojo Gabinete sa storycon ng pelikulang Daluyong (Storm Surge) ng BG Productions ni Ms. Baby Go, nalaman naming mas magiging active na rin si Diana sa showbiz.
Pagkatapos ng paglabas sa teleserye ng ABS CBN na Bukas na Lang Kita Mamahalin na pinagbidahan ni Gerald Anderson ay napapanood ngayon si Diana sa sitcom na Home Sweetie Home nina John Lloyd Cruz at Toni Gonzaga.
Bukod sa TV show, may pelikula rin ang aktres. Siya ang leading lady ni Allen Dizon sa Daluyong. Sensitibo at kontrobersiyal ang tema ng pelikula dahil ukol ito sa paring nakabuntis. Si Diana ang gaganap na nabuntisang karelasyon ng pari.
Ito ay pamamahalaan ni Direk Mel Chionglo at mula sa panulat ni Ricky Lee. Makakassama rito nina Allen at Diana sina Eddie Garcia, Tirso Cruz III, Ricky Davao, at Chanda Romero.
Atak Arana, bilib kina Vice Ganda at Direk Wenn
MADALAS mapanood ang komedyanteng si Atak Arana sa mga pelikula ni Direk Wenn V. Deramas tulad ng Vice Ganda starrer na Petrang Kabayo at Girl Boy Bakla Tomboy. Bukod sa paglabas sa pelikula, si Atak ay kilala rin bilang stand-up comedian sa mga comedy bar tulad ng Zirkoh at Klownz.
Ngayon ay kasali ulit siya sa dalawang pelikula ng Blockbuster Direktor na si Direk Wenn, ang Moron 5.2 at ang part-2 din ng Praybeyt Benjamin ni Vice.
Ano’ng masasabi niya kina Vice at Direk Wenn na madalas niyang makatrabaho?
“Si Vice, nagkasama kami dati noong nasa Punchline at Laffline pa ako. Masaya siya katrabaho, dapat mabilis ka rin kapag kasama siya, ang bilis kasi ng utak niya.
“Si Direk Wenn naman, for me anointed direktor siya. Napakahusay at mabilis magtrabaho at talagang matututo ka sa kanya. Sobrang mag-e-enjoy ka sa set kay Direk Wenn.”
Ipinagmalaki rin ni Atak ang dalawang pelikula nila. “Showing na po ang Moron 5 part- 2 ngayong Nov. 5 at ang Praybeyt Benjamin ni Vice, sa December 25 naman sa MMFF.
“Ang masasabi ko lang sa Moron 5.2, pinag-isipan ito lalo ni Direk Wenn para maging mas masaya kaysa sa part-1. Lahat na cast dito may kanya-kanyang moment, pero short role lang ako rito. Ang Praybeyt Benjamin naman, siyempre hindi papayag si Direk Wenn na hindi ito maging super-mega blockbuster. Challenging din ang role ko rito,” wika pa niya.
Idinagdag pa ni Atak na bilang komedyante at entertainer, malaking kaligayahan sa kanyang part kapag napapasaya niya ang mga manonood. Kaya todo-bigay talaga siya sa bawat performance na ginagawa.
Nonie Nicasio
