Bungangera hinangaan ng mga BKs

Hinangaan ng mga BKs sa pagremate ang kabayong si Bungangera sa naganap na 2014 PHILRACOM “3rdLeg, Juvenile Fillies Stakes Race” nakaraang Sabado sa pista ng SLLP sa Carmona, Cavite .

Pagbukas ng aparato ay hindi gaanong maganda ang lundag ni Bungangera, kaya bahagyang napasaltak ang kanyang sakay na si Jeff Bacaycay. Habang papaliko sa unang kurbada ang mga nasa harapan ay natanaw sa monitor na nasa hulihan pa si Bungangera na nakontrol na ang renda.

Paglagpas ng medya milya ay sinimulan nang galawan ni Jeff ang kanyang dala at agaran namang nagresponde si kabayo, kaya habang nasa tapat ng tres oktabos ay dalawang kalaban kaagad ang kanyang nalagpasan.

Pagsapit sa ultimokuwarto o huling 400 meters ng laban ay biglaan silang nakalusot sa ikaanim na puwesto sa bandang gitna at animo’y nagsusumigaw ng “tabi kayo riyan, eto na ako”.

Pagsungaw sa rektahan ay nakatanaw si Jeff na maluwag sa gawing labas ng pista, kaya ipinuwesto niya sa pakanan si Bungarera. Sa pagkakataong iyon ay lalo pang nagalit at tumindi ang kamot sa pista ni Bungangera hanggang sa pagsapit ng meta ay nalagpasan nila ang nauuna ng kalaban na si Princess Ella ni John Alvin Guce.

Naorasan ang tampok na pakarerang iyan ng 1:28.6 (12’-23’-25-27’) para sa distanisyang 1,400 meters. Para sa kumpletong datingan mula sa tersera hanggang sa hulihan ay sina Imcoming Imcoming, Leona Lolita, Dolce Ballerina, Valley Ridge, Princess Meili, Hook Shot, Pusang Gala, Shout For Joy, Burbank, Enchanted at Pag Ukol Bubukol.

Congratulations sa owner niyang si Ginoong Alberto C. Alvina at sa trainer niyang si Ginoong Donnie Sordan. GOD Bless at more winnings to come sa inyong koneksiyon.

Fred Magno