VFA national defense strategy ng PH (Giit ng Palasyo)

MAS dapat ikonsidera ang Visiting Forces Agreement (VFA) bilang bahagi ng “national defense strategy” ng Filipinas, imbes batikusin dahil sa kaso nang pagpatay ng isang US Serviceman sa isang Filipina transgender.
“This is part of the overall national defense strategy ng ating bansa—‘yon pong Visiting Forces Agreement. ‘Yon po ang mas malaking larawan habang tinutukoy natin ‘yung mga partikular na isyu hinggil sa jurisdiction at custody,” ayon kay Communications Secretary Herminio Coloma Jr.
Paliwanag ni Coloma, makaraan mawala ang US military bases sa Filipinas ay ang VFA na ang patakaran na umiiral hinggil sa pagdalaw ng mga tropang Amerikano sa bansa, pagganap ng joint military exercises ng US at ng Armed Force of the Philippines (AFP).
Nagkakaisa aniya ang Filipinas at US hinggil sa kahalagahan ng masinsing pakikipag-ugnayan bilang pagtiyak na iiral ang katarungan sa kaso ni Laude.
Tiniyak niya na sinusunod ang proseso ng batas sa kaso ni Laude, na ang ang mayroong hurisdiksyon ay ang Filipinas at batas ng ating bansa ang paiiralin.
Si Laude ay natagpuang wala nang buhay noong Oktubre 11 sa isang motel sa Olongapo City, ilang minuto makaraan magkasama silang pumasok ni Private First Class Joseph Scott Pemberton.
Kasalukuyan nakadetine sa USS Peleliu si Pemberton, itinuturing na pangunahing suspek sa pagpatay kay Laude batay sa testimonya ng ilang testigo.

(ROSE NOVENARIO)