Misis napatay mister nagbigti

NAGA CITY – Pinatay muna ang kanyang kinakasama bago kinitil din ng isang padre de pamil-ya ang kanyang sarili sa Brgy. Siera, Lagonoy, Camarines Sur kamakalawa.

Kinilala ni PO3 Rolly Nebran ng PNP-Lagonoy ang biktimang si Sherlyn Malaguenio, 27, habang ang suspek ay si Rolly Baranda, 29-anyos.

Ayon kay Nebran, pinuntahan ng ina ni Baranda ang bahay ng mag-live-in na halos katabi lamang ng kanilang tirahan, upang gisingin ang dalawa dahil tanghali na.

Nang sumilip sa bintana si Natividad Baranda, nakita niya ang kanyang 6-anyos apo na nakatayo sa loob ng kanilang bahay.

Inutusan ni Natividad ang bata na lumabas dahil tanghali na.

Ngunit sumagot ang bata na hindi siya makalalabas dahil may dugo ang kanyang ina.

Bunsod nito, dali-daling pumasok ang matanda sa bahay ng dalawa at doon ay tumambad sa kanya ang nakabitin na katawan ni Baranda sa kusina at wala nang buhay.

Habang sa sala ay nakahandusay si Malagueno na duguan at may tama ng saksak sa katawan.

Sa pagsisiyasat sa lugar ng pinangyarihan, nakuha ng mga pulis ang isang cellphone na pag-aari ni Baranda at nakita ang naka-save na mensaheng humihingi ng tawad sa kanyang ina dahil nadisgrasya niya si Malagueno.
Paniwala ng pulisya, nag-away ang dalawa dahil sa selos ngunit aksidenteng napatay ni Baranda si Malagueno.
Nang malamang wala nang buhay ang kinakasama ay saka nagdesisyong kitilin ang sarili sa pamamagitan ng pagbibigti.