Kelot binurdahan ng 50 saksak

UMABOT sa 50 saksak sa katawan ng isang hindi nakikilalang lalaki at itinapon sa kalsada ang bangkay kahapon ng madaling-araw sa Sta. Mesa, Maynila.

Ayon sa imbestigasyon ni SPO3 Glenzor Vallejo, nakita sa footage ng CCTV ng Brgy. 428, Zone 43, District 4, Sta. Mesa, Maynila ang isang pampasaherong jeep na dahan-dahang tumatakbo sa panulukan ng Algeria St., Sta. Mesa.

Pagtapat sa bahay na may numerong 1966 at 1967 ay itinapon ng tatlong hindi nakilalang lalaki ang bangkay ng biktima.

Sinabi ni Vallejo, tukoy na ang may-ari ng pampasaherong jeep ngunit hindi muna magbibigay ng iba pang detalye habang isinasagawa ang follow-up operation laban sa mga suspek.

Aniya, mukhang galit na galit ang mga suspek dahil tinadtad nila ng saksak ang katawan ng biktima.

“Tadtad ng saksak ‘yung leeg pati yung mga braso, sunod-sunod at tabi-tabi yung saksak, klaseng galit na galit ‘yung mga suspek,” dagdag pa ni Vallejo.

(LEONARD BASILIO)