Apela sa US dapat madaliin ng DFA (Sa kustodiya sa sundalong Kano)

Nagsagawa ng kilos protesta ang grupong League of Filipino Students na akyusan at hustisya kay Jeffrey “Jennifer” Laude sa pagpatay ni Private First Class Joseph Scott Pemberton na makulong na igiit ibasura ang Visiting Forces Agreement (VFA) Enhanced Deffense Cooperation Agreement (EDCA) na ginanap sa Palma Hall University of the Philippines Diliman Quezon City (Kuha ni Ramon Estabaya)

 

PINAALALAHANAN ni Presidential Spokesman Edwin Lacierda ang Department of Foreign Affairs (DFA) na kailangan ang agarang pag-apela sa U.S. authorities para sa kustodiya ng sundalong Amerikano na suspek sa pagpatay sa transgender woman na si Jeffrey Laude alyas Jennifer.

Ayon kay Lacierda, posibleng mahirapan na ang Philippine government na makuha pa ang kustodiya kay Private First Class Joseph Scott Pemberton kung aabot pa ng isang taon ang pag-apela rito.

Aniya, kailangan nang mabilisan at matalinong hakbang na gagawin ng DFA upang hindi matulad ang kaso ni Laude sa kaso ni Nicole na hinalay ng U.S. Marine na si Lance Corporal Daniel Smith sa Olangapo City.

Napagdesisyonan noon ng Korte Suprema na tuluyang ibigay ang kustodiya sa bansang Amerika.

Dagdag pa ni Lacierda, ayaw nilang mangyari na magiging huli na ang lahat para sa DFA na makuha ang kustodiya ni Pemberton at hindi mabigyan ng hustisya ang kamatayan ni Laude.

US MARINE PINADALHAN NG SUBPOENA

PINADALHAN na ng subpoena ang US Marine na kinasuhan ng murder sa pagkamatay ng transgender na si Jeffrey Laude alyas Jennifer.

Sa pamamagitan ng Department of Foreign Affairs (DFA) Manila office, ipinadala ng Olongapo City Prosecutor’s Office ang subpoena kay Private First Class Joseph Scott Pemberton para dumalo sa preliminary investigation sa Martes, Oktubre 21, dakong 2 p.m.

Kasamang ipinatawag ng korte ang ilang kaanak ni Laude.

Pinahaharap din sa imbestigasyon ang testigong si “Barbie” at ilang staff ng Ambyanz Disco Bar at Celzone Lodge.

Matatandaan, sa Celzone natagpuang patay si Laude at ang Amerikanong sundalo sinasabing ang huli niyang nakasama.