HATAW! D'yaryo ng Bayan hatawtabloid.com
IBINASURA ng Navotas Prosecutor’s Office ang kasong libelo na isinampa ng isang barangay kagawad laban sa anim reporters at isang doktor ayon sa inilabas na desisyon kamakalawa.
Sa desisyon ni Fiscal Jennie C. Garcia na inaprubahan ni fiscal Lemuel B. Nobleza, OIC ng Malabon-Navotas City Prosecutor’s Office, walang sapat na basehan ang kasong libelo laban sa anim reporters at isang doktor kaya’t ibinasura ito.
Nag-ugat ang libel case nang lumabas sa mga pahayagan ang insidenteng kinasangkutan ni Brgy. Kagawad Danilo Trinidad na inireklamo ni Dr. Henry Tinio, nakatalaga sa San Roque Health Center, ng grave threat at unjust vexation makaraan magsisigaw, magbanta at manakot ang kagawad nang hindi mapagbigyan ang pagpapatuli ng isang batang lalaki sa ginanap na Operation Libreng Tuli noong nakalipas na Mayo 21, 2014 sa Brgy. Sipac Almacen ng nasabing lungsod.
Magugunitang sinampahan ng kasong libel ang mga reporter na sina Beth Samson at Jun Paclibar ng Police Files Tonite; Cherk Almadin ng Abante; Rey Galupo ng Phil. Star; Orly Barcala ng Balita; Rommel Sales ng Hataw Diyaryo ng Bayan, gayondin si Dr. Tinio dahil sa sinasabing mapanirang artikulong nasulat laban kay Trinidad.
Itinanggi ito ng mga manunulat at idiniing ibinase nila ang balita sa ulat sa pulisya (spot report) tungkol sa insidenteng kinasangkutan ng kagawad laban sa doktor.
Base sa naging desisyon ng korte, “Wherefore, premises considered, The Undersigned respectfully recommends the filing of information for Grave Threats and Unjust Vexation against respondent Danilo Trinidad. Bail not necessary unless required by the court. The complaints for Perjury and LIBEL are recommended DISMISSED.”
(ROMMEL SALES)
