HATAW! D'yaryo ng Bayan hatawtabloid.com
SEXY, morena, at maganda. Mga katangiang hinahanap ni Direk Edgardo “Boy” Vinarao na magbibida para sa kanyang pelikulang Bacao, isa sa entry sa Sineng Pambansa National Film Festial 2014 na ipalalabas ng Film Development Council of the Philippines (FDCP).
Tamang-tama sa mga katangiang ito ni Michelle Madrigal na gaganap bilang isang babaeng napakaganda at kaakit-akit na lumaki sa isang baryo.
Ito ang kauna-unahang pagbibida ni Michelle after 10 years ng pamamalagi niya sa showbiz. Ngayon lamang siya nabigyan ng ganitong break at sadyang napakaganda ng istorya ng Bacao mula sa isang napakahusay na director. Sabi nga ng marami, tailor-made para kay Michelle ang karakter na gagampanan niya na gustong magka-anak at magkaroon ng malaking pamilya pero hindi natupad gayung wala silang problemang mag-asawa.
“Kinabahan po ako noong una pero magaling na director si Direk Boy at inalalayan niya ako sa maraming eksena,” sabi ni Michelle ukol sa pagbibida niya.
Sa Bacao ay medyo may pagka-sexy at maraming daring scene rito si Michelle, pero iginiit niyang bago tinanggap ang proyektong ito’y makailang beses muna niyang pinag-isipan at binasa ang script.
“Noong sinabi nila na medyo sexy nga itong movie, tinanong ko siyempre agad kay direk kung gaano ka-sexy. Kasi, kahit before pa may mga offer na sa akin na mag-sexy. Pero siyempre, ako naman gusto ko mas ipakita ‘yung versatility ko as an actress.
“Ayoko namang gumawa ng ganoon na mag-bold tapos end na ng career ko. Sayang naman ang 10 years ko na binuno rito sa showbiz specially ngayon na nag-aaral pa ako. Parang hindi ako makakakuha ng trabaho kasi baka sabihin nila, ‘ay bold star ‘yan’. Hindi pwede ‘di ba?” mahabang paliwanag ni Michella at iginiit na wala namang nakitang maselang bahagi sa kanyang katawan.
Ani Michelle, kung may frontal mang may nakita sa kanya, malayo ang shot niyon at puro gilid-gilid lang ang nakita sa apat na beses na lovescene nila ni Arnold Reyes, ang gumaganap na asawa niya sa pelikula.
Sinabi pa ni Michelle na isang suspense/thriller ang pelikula at ang lovescene na ginawa nila ay kasama at kailangan sa istorya.
May rape scene rin ang aktres dito dahil pinagsamantalahan siya ng albularyong si Leo Martinez at kumpare nito sa pelikula.
Sa kabilang banda, pinuri naman ang pagiging propesyonal at galing sa pag-arte ni Michelle ng kanilang director.
“Magaling siyang artista. May lalim ang akting. Wala akong problema dahil madali siyang makasunod sa mga instruction ko. Higit sa lahat, professional si Michelle at wala akong naging problema sa kanya. Maaga pa nasa set na ito at memoryado na ang linya,” ani Direk Vinarao.
Ang Bacao ay mula sa Oro de Siete Productions na mapapanood sa piling SM Cinemas. Magsisimula itong mapanood sa October 29.
ni Maricris Valdez Nicasio
