TNT pinataob ng Batang Pier sa Albay

PINANGUNAHAN nina Stanley Pringle at Ronjay Buenafe ang matinding ratsada ng Globalport sa huling yugto tungo sa 88-78 panalo kontra Talk n Text noong isang gabi sa huling laro ng PBA Holcim Liga ng Bayan sa Legaspi City, Albay.

Naisalpak nina Pringle at Buenafe ang tig-isang tres upang burahin ng Batang Pier ang 64-60 na kalamangan ng Tropang Texters sa pagtatapos ng ikatlong quarter tungo sa panalo.

Nagtala si Pringle ng 24 puntos habang nagdagdag si Buenafe ng 17 puntos para sa tropa ni coach Pido Jarencio na sisikaping makabawi mula sa kanilang pagiging kulelat noong huling PBA season.

Sa panig ng TNT, hindi pa ito gaanong sanay sa sistema ng bagong head coach na si Jong Uichico na pumalit kay Norman Black na coach ngayon ng Meralco Bolts. (James Ty III)