HATAW! D'yaryo ng Bayan hatawtabloid.com
PAGKATAPOS ng masakit nitong pagkatalo sa Final Four ng men’s basketball, pagdedepensa ng titulo ng women’s volleyball ang pakay ng Ateneo de Manila sa UAAP Season 77.
Sinabi ng athletic director ng Ateneo na si Ricky Palou na ang National University ay magiging unang kalaban ng tropa ni coach Tai Bundit sa Nobyembre 23 sa Smart Araneta Coliseum.
Sa pangunguna nina Alyssa Valdez at Denden Lazaro, tinalo ng Ateneo ang NU sa Final Four at La Salle sa finals upang makamit ang kaunaunahan nilang korona sa women’s volleyball ng liga.
Ang men’s team naman ay natalo sa NU sa finals.
“The girls are practicing twice a day,” wika ni Palou. “Our title defense will be hard because La Salle and NU are raring to get back at us. There is also FEU and UP that have also been rebuilding. We will focus on hard work and defense which carried us to the title last season.”
Idinagdag ni Palou na may ilang mga rookies na kasali sa Lady Eagles sa pangunguna nina Joanna Maraguinot at Therese Gaston na anak ng dating PBA player na si Matthew “Fritz” Gaston.
Lilipad ang Lady Eagles patungong Thailand at tatagal sila roon ng 12 araw para mag-ensayo para sa UAAP.
Tungkol sa men’s basketball team, sinabi ni Palou na babalik sa ensayo ang tropa ni coach Bo Perasol sa susunod na linggo para paghandaan nila ang UniGames sa Iloilo at ang regional qualifiers ng Philippine Collegiate Champions League.
“We’ll have to work harder in the qualifiers,” ani Palou. “This is the first time in a long while that we are not seeded in the PCCL.”
Dalawang Eagles — sina Chris Newsome at Nico Elorde — ay lalaro para sa Hapee Toothpaste sa PBA D League.
Ni JAMES TY III
