HATAW! D'yaryo ng Bayan hatawtabloid.com
LEGAZPI CITY – Tinutugis ng mga awtoridad ang magkapatid na suspek sa pagpatay sa kanilang kaibigan na nakabuntis sa dalagitang kapatid ng mga salarin.
Kinilala ang biktimang si Gener Alamo, 43, may asawa, residente ng Bgry. 1, Ems Barrio, sa Lungsod ng Legazpi, at empleyado ng isang telecommunications company.
Sa imbestigasyon ng pulisya, nagkayayaang mag-inoman ang biktima at ang mga suspek na sina Bonifacio Llansos, Jr., ng Brgy. Salvacion, bayan ng Jovellar; at Wilfredo Llansos ng Brgy. Talunto, bayan ng Camalig, sa bahay ng tiyahin ng mga salarin sa Brgy, Binitayan, bayan ng Daraga.
Nang maubos ang biniling alak, nagpaalam na para umuwi ang biktima ngunit pinigilan siya ng mga suspek at inusisa tungkol sa relasyon sa 16-anyos kapatid ng mga salarin.
Sa kalasingan, umamin ang biktima na siya nga ang nakabuntis sa dalagita. Bunsod nito, uminit ang ulo ng mga suspek at pinagtulungang saksakin ang biktima.
Pagkaraan ay itinapon ng mga suspek ang bangkay ng biktima sa isang ilog. (HNT)
