Kotongan sa pantalan inamin ng Palasyo

INAMIN ng Palasyo na talamak ang kotongan sa pantalan kaya’t magbabalangkas ng mga bagong patakaran ang Bureau of Customs (BoC) para maayos ang sistema nang paggalaw ng mga kargamento.

Sa katunayan, ayon kay Cabinet Secretary Rene Almendras, pwede na siyang magsulat ng ‘Handbook on Kotong’ para talakayin ang malalang pangingikil sa importers at truckers sa loob at labas ng pantalan.

“Ano po, pagkatapos nito pwede na akong magsulat ng ‘Handbook on Kotong’. Meron pong kotong sa labas, merong kotong sa loob, may kotong sa dinadaanan, may kotong sa…I’m sorry, as I said, the task force decided. Nandito na tayo, we are trying to solve this problem. Let’s do the most we can to clean up the process,” aniya.

Mag-iisyu aniya ang BoC ng bagong alituntunin kung sino ang pwedeng pumigil at mag-release ng mga kargamento, alinsunod sa pagresolba sa problema ng port congestion at lutasin ang suliranin sa kotongan.

“So, Customs is going to issue a new guideline. Customs is going to issue guidelines kung sino ang pwedeng mag-hold ng cargoes, sino ang pwedeng mag-yes or mag-no ng movement ng cargo. There will be a procedure to verify na the importer has the…I guess the word po is transparency,” dagdag niya.

(ROSE NOVENARIO)