JaDine, kaya kayang tapatan o higitan ang KathNiel?

SA pagpatok ng mga pelikulang pinagbibidahan nina James Reid at Nadine Lustre, sinasabing sila ang makakalaban ng loveteam nina Kathryn Bernardo at Daniel Padilla.

Marami nang napatunayan ang KathNiel. Mapa-movie o teleserye, talagang patok ito. Ang JaDine, pelikula pa lamang sila nasusubukan. Pero malapit na ring patunayan ng dalawa ang lakas nila sa nalalapit nilang teleserye sa ABS-CBN2, ang Wansapanataym, presents My App Boyfie

Samantala, sinabi kapwa nina James at Nadine na hindi raw nila sasayangin ang magandang takbo ng kanilang karera ngayon. Itinuturing kasi nilang pangalawang pagkakataon nila ito sa showbiz kaya naman iwas daw muna sa pakikipagrelasyon.

Ang usapang ito’y tatalakayin at mapapanood sa Tapatan Ni Tunying ngayong Huwebes (Setyembre 25).

“Naranasan kasi naming mawala ‘yong opportunity kasi medyo napabayaan, hindi sineryoso, at hindi nag-focus. Ayaw na namin maulit iyon,” ani Nadine.

Unang nabigyan si James ng break sa showbiz matapos siyang tanghaling Big Winner ng Pinoy Big Brother Teen Clash, ngunit hindi niya itinuloy ang pag-arte dahil nalilito at hindi pa raw siya sigurado sa tatahakin niyang karera noon.

“Parang ‘di ako masyadong seryoso rati. Bata pa ako. Hindi ko pa noon alam kung ano talaga ang gusto kong gawin,” kuwento ni James.

Nagsimula naman magtanghal sa telebisyon at pelikula si Nadine noong siya’y bata pa, subalit aminado siyang marami siyang oportunidad na pinalampas.

“Nagkaroon ako ng teleserye at pagkatapos noon medyo natengga ako. Kasi noong time na gumagawa ako ng mga teleserye parang nilalaro ko lang. Hindi ko po siya masyadong sineryoso,” sabi pa ni Nadine.

Matapos ang kanilang pinagdaanan, umingay ang pangalan ng dalawa nang pumatok ang mga pelikulang Diary ng Panget at Talk Back and You’re Dead. Kamakailan lamang ay pumirma sila ng exclusive contract sa ABS-CBN.

Nang tanungin kung kaya bang pantayan ng JaDine ang kasikatan ng loveteam nina Kathryn at Daniel o mas kilala sa tawag na KathNiel, sagot ni Nadine, “Siguro po pero matagal pa. Marami pa kaming kailangang pagdaanan.”

Huwag palampasin ang Tapatan ni Tunying ngayong Huwebes (Setyembre 25), 4:30 p.m. sa ABS-CBN Kapamilya Gold. Para sa updates, sundan ang @TNTunying sa Twitter at Instagram, o i-like ang www.facebook.com/TNTunying.

ni Maricris Valdes Nicasio