Snooky, aminadong napagdaanan din ang midlife crisis

ni Roldan Castro

TAPOS na rin ang Homeless ng BG Productions na pinagbibidahan nina Ejay Falcon, Ms. Snooky Serna, Dimples Romana, Hayden Kho, Chocoleit, Ynna Asistio, Rico Barrera, Mico Aytona, at Martin del Rosario. Mula  rin sa panulat at direksiyon ni Buboy Tan. Tinalakay nito ang buhay ng mga biktima ng kalamidad na naging biktima rin ng “human trafficking”. Partly shot in Cambodia. Nakatakda itong ipalabas sa susunod na taon sa Europa at Canada.

Nakatsikahan din namin ang isa sa cast na si Snooky. Hindi ba siya nanghinayang na hindi siya natuloy sa Ang Dalawang Mrs. Real na makakasama sana niya si Maricel Soriano?

Hindi raw siguro kaloob ng Diyos at may iba pa namang pagkakataon.

Sina Sharon Cuneta at Maricel ay dumaan sa midlife crisis, na-experience din ba niya?

“Napagdaanan ko na ‘yun.Tapos na. Menopause na ako ngayon. Ha!ha!ha!,” natatawa niyang sagot.

Lahat naman daw ay napagdaraanan ang ganoon. Pero dahil sa dasal at moral support ay natagpuan niya ulit ang sarili niya.