HATAW! D'yaryo ng Bayan hatawtabloid.com
BINIRO rin ng tanong ang movie produ na si Baby Go kung sino ang mas mayaman sa kanila ni Mother Lily Monteverde dahil sa rami ng pelikulang ipino-prodyus. Isa siyang real estate broker at negosyante bago sumalang sa pag-prodyus. Nakipagsosyo siya sa pelikulang Lihis at ginawa rin niya ang Lauriana. Tapos na niya ang Bigkis at Homeless. Si Baby ay produ na mukhang tulala at iba ang focus nang ipakilala kami sa kanya ng kanyang line producer na si Dennis Evangelista. Ha!ha!ha!
“Si Mother Lily siyempre,” pagpatol niya sa tanong.
“Negosyo ang pagpo-prodyus ng pelikula kaya dapat bumalik ang puhunan at pasalamat tayo kapag kumita ng kaunti. Pero ang importante maganda ang layunin para tayo suwertehin. Masarap ang pakiramdam kapag nakakatulong at nakakapagbigay ng proyekto at trabaho. Iyong foundation for street children na itinatayo ko partly ng income ng movies ay ibibigay ko roon. Napakasaya ko rin kapag maganda at makabuluhan ang pelikulang ginagawa namin. This is not my bread and butter pero na-enjoy ko ang pagpo-prodyus at nabibigyan ko ng trabaho ang ibang artista,” deklara niya.
Sa darating na buwan ay dalawang pelikula ang halos sabay na gagawin ng BG Productions International. Una rito, ang Child House mula sa panulat ni Socorro Villanueva at sa direksiyon ni Louie Ignacio.
Ang isa pang pelikula ay ang Daluyong ( Storm Surge) mula sa panulat ni Ricky Lee at direksiyon ni Mel Chionglo.
Kasamang nagpapatakbo ng BG Productions International ang associate producer na si Romeo Lindain, production consultant Mario Marcos, at Supervising Producer Dennis Evangelista.
Bukod dito may rooster of talents rin na tinutulungan ang BG Productions na kasama sa mga pelikulang ginagawa niya sila ay sina Jash Ezekiel, Benz Sangalang, Kiel Villajin, Rhen Abad, at Vince Celis.
