HATAW! D'yaryo ng Bayan hatawtabloid.com
NAKATUTUWA ang biruan nina Mother Lily Monteverde at Nora Aunor sa presscon ng pelikulang Dimentia kahapon na ginawa sa Imperial Hotel na idinirehe ni Percival Intalan.
Bago ang presscon, nag-akap muna sina Ate Guy at Mother Lily at saka nasambit ng Regal Matriarch na, ”I became rich because of Ate guy. You know why? Because she gave me Valencia (ang mansiyong dating pag-aari ng Superstar). Thank you Ate guy. I will always remember that. From the bottom of my heart, talagang mahal na mahal kita,” giit ni Mother Lily.
Sinagot naman ito ni Nora ng, ”Ako rin naman mother eh, sa totoo lang”.
“Totoong tao tayo body and soul magkasama tayo,” sagot muli ni Mother Lily.
“Oo naman mother,” pakli ni Ate Guy. “Isauli n’yo na lang ang Valencia,” natatawang giit ng Superstar kay Mother Lily na tila deadma naman sa sinabi niya at kinantahan lamang siya.
Muli namang iginiit ni Nora ang, ”Yes please bago ‘yun (ang pagkanta) ‘wag n’yo nang kalimutan ang Valencia. Isauli mo na.”
Sa kabilang banda, ang Regal Films ang magri-release at magdi-distribute ng pelikulang Dimentia na bukod kay Ate Guy ay pinagbibidahan din nina Jasmine Curtis-Smith, Bing Loyzaga, Yul Servo, Chynna Ortaleza, Althea Vega, jeric Gonzales, Lou Veloso, at Lui Manansala.
Ito’y mula sa istorya ni Jun Robles Lana at palabas na sa mga sinehan sa September 24.
Ang Dimentia ay isang horror film na ukol sa isang babaeng nagngangalang Mara Fabre (Nora) na na-diagnose na mayroong dementia kaya dinala siya sa kanilang probinsiya sa Batanes sa pag-asang maibabalik ang kanyang memorya. Pero hindi iyon ang nangyari dahil doon nag-umpisang may mga nakikita siyang siya lamang ang nakakakita.
ni Maricris Valdez Nicasio
