Malolos COP sinibak (2 tauhan sabit sa KFR)

SINIBAK sa pwesto ang hepe ng Malolos City Police sa lalawigan ng Bulacan makaraan masangkot sa kidnapping ng isang Chinese national sa Caloocan City ang dalawa niyang tauhan.

Sa ulat mula sa tanggapan ni Bulacan Police director, Senior Supt. Ferdinand Divina, sinibak si Supt. Donato Bait at itinalaga si Supt. Arwin Tadeo bilang acting Malolos City police chief.

Ang pagkakasibak kay Bait ay bunsod ng pagkakadawit ng dalawa niyang tauhan na sina PO1 Danito Sytamco at PO3 Xerxes Martin sa pagdukot sa negosyanteng si Lin Hanzhang noong Setyembre 9.

Si Lin ay nakatakas sa mga dumukot sa kanya at itinuro rin ang isang pulis-Guiguinto na si PO1 Arnel Aguilar bilang kasama ng dalawang suspek makaraan matukoy ng biktima ang licence plate ng sasakyan.

Binigyan ni Divina ng 24 oras ang hepe ng Guiguinto Police na si Supt. Ernesto Cruz para isuko si Aguilar at maipakulong sa kasong kinasasangkutan.

(MICKA BAUTISTA)