Bakit pati si Coleen ay magbabakasyon sa Showtime?

ni Ed de Leon

INAMIN ni Billy Crawford hanggang sa piskalya ang kanyang kasalanan at inamin niyang lasing siya talaga ng makagawa ng kaguluhan sa loob mismo ng presinto ng pulisya.

Kusa siyang nagpunta sa presinto, hinihingi niyang ikulong siya pansamantala dahil ayaw niyang makasakit ng kahit na sinong tao. Dahil sa kalasingan, hindi rin niya alam kung paano nga nangyari, na nabasag niya ang salamin sa sliding door sa presinto.

Dahil doon talagang kinulong siya ng tuluyan at kailangan niyang magpalipas ng isang buong araw sa kulungan dahil nangyari iyon ng Linggo ng madaling araw, at wala namang piskal sa ganoong araw. Kaya nga kinabukasan pa siya naiharap sa piskal at pinag-piyansa ng P6,000 na mabilis naman niyang binayaran para siya makalaya. Pero sinampahan siya ng kasong malicious mischief at disobedience to persons in authority. Maliban doon, hindi naman tinanggap ng piskalya ang iba pang kaso.

Tama naman ang sinasabi nila, bago iyan ay wala namang iba pang kaso ng kaguluhan o pagwawala iyang si Billy. Pero sabi nga ng ilang observers, mukhang sanay na sanay na ang kanyang manager sa mga ganoong kaso. Kasi nga ang isa pang talent ng kanyang manager, si Baron Geisler, ay napakadalas nang masangkot sa kaso ng pagwawala kaya siguro sanay na ang manager niya kung ano ang gagawin at sasabihin sa mga ganoong pagkakataon.

Kasabay niyan, sinabi rin naman na hindi muna mapapanood si Billy sa kanilang noontime show, ang ipinagtataka lang namin, bakit pati ang kanyang syotang siColeen Garcia ay magpapahinga rin muna sa kanilang show.

Anyway mas mabuti na nga ang nangyaring iyan, at least maayos naman ang lahat. Aminado naman siya sa kanyang kasalanan, at siguro magtatanda na siya na huwag masyadong maglalasing. Leksiyon din naman iyan sa iba na huwag maglalasing kung hindi kaya.