5 pang hulidap cops sumuko

SUMUKO na rin ang lima pa sa pitong isinasangkot sa naganap na kidnap-hulidap sa EDSA Mandaluyong City nitong Setyembre 1, 2014 na nakunan ng larawan ng isang netizen na nag-post sa Facebook.

Ngunit tumanggi pang pangalanan ng pamunuan ng Quezon City Police District (QCPD) ang limang sumuko.

Ngunit ayon sa isang opisyal na tumangging magpabanggit ng pangalan, personal na sumuko sa QCPD Headquarters sa Kampo Karingal kahapon ng hapon ang limang sina SPO1 Ramil Hachero, PO1 Mark de Paz, PO2 Ebonn Decatoria, pawang nakatalaga sa La Loma Police Station 1; PO2 Jerome Datiguinoo, at PO2 Weaven Masa.

Ang pagsuko ng lima ay upang linisin ang kanilang pangalan sa pagkakadawit sa pag-kidnap at paghulidap sa dalawang tauhan ng isang contractor, at tinangay ang P2 milyon ng mga pulis-QCPD na nakatalaga sa La Loma Police Station 1.

Samantala, patuloy na pinaghahanap sina Sr. Insp. Marco Polo Estrera, dismissed, Sr. Insp. Oliver Villanueva, at dalawa pang John Does.

Matatandaan, nitong Miyerkoles naunang sumuko kay QCPD District Director, Chief Supt. Richard A. Albano, si Senior Insp. Allan Emlano, isang pulis-Caloocan, para linisin ang kanyang pangalan makaraan idawit sa kaso ng kidnap-hulidap sa EDSA. (ALMAR DANGUILAN)

RECORDS NG HULIDAP COPS TARGET NG NAPOLCOM

HINAHALUKAY na ng National Police Commission ang records ng mga pulis na sangkot sa EDSA hulidap noong Setyembre 1 sa Wack-Wack, Mandaluyong City.

Binigyan ng isang linggo ni DILG Secretary Mar Roxas ang Napolcom para ibigay sa kanya ang records ng nasabing mga pulis.

Ayon kay Napolcom director Eduardo Escueta, hindi lamang ang records ng mga pulis na sangkot sa EDSA hulidap ang kanilang binubusisi kundi pati na rin ang iba pang mga pulis na nasangkot din sa mga iba’t ibang criminal activities.

Una rito, kinompirma ni Escueta na mayroon nang kahalintulad na EDSA hulidap na kaso sina PO2 Jonathan Rodriguez at SPO1 Hachuela noong 2011.