HATAW! D'yaryo ng Bayan hatawtabloid.com
SIMPLENG natapos ang pagdiriwang ng buhay ni Ralph Joseph Eigenmann o Mark Gil. Sa isang simple at pribadong seremonya na pinangunahan ng kanyang pamilya, at dinaluhan ng marami niyang mga kaibigan at tagahanga, at mga kasamahan sa showbusiness, naghalo ang lungkot ng mga tao, at ang kanilang pagmamalaki na nakilala nila si Mark, isang mahusay na actor at mabuting kaibigan.
Noon lang ding umagang iyon dumating si Sid Lucero, na Tim Eigenmann sa tunay na buhay at anak din ni Mark mula sa taping ng isa niyang serye sa abroad. Tumuloy agad siya sa wake at doon ay hindi niya napigilang humagulgol nang makita ang lalagyan ng abo ng kanyang ama. Sa ipinakikita at sinasabi ng kanyang mga anak, maliwanag na kung nagkaroon man siya ng problema sa kanilang mga ina, hindi naapektuhan at hindi niya pinabayaan ang kanyang mga anak.
Naalala rin ng isang nakasama niya sa isang project nitong mga huling araw na nakikita raw nila ang unti-unting pagkahulog ng kanyang katawan. Pero sa tuwing tatanungin daw nila ay sinasabi lang niyon na okey naman siya at walang problema. Inaalala rin daw nila si Mark noon, bagamat hindi nga nila alam na terminal cancer na pala ang kanyang sakit. Masama sa mga nasa ganoong kalagayan ang mapuyat. Masama rin naman ang ma-tension, na nangyayari at hindi naman maiiwasan kung gumagawa ng isang teleserye, pero sinasabi nga raw ni Mark na okey naman siya, at talagang gusto niyang gawin ang seryeng iyon dahil gusto niya ang material.
Natapos naman niya ang serye, at pagkatapos niyon ay wala na nga siyang natanggap na iba pang projects. Siguro nga masama na rin naman ang pakiramdam niya talaga, ayaw lang niyang ipahalata iyon kahit na sa kanyang pamilya. Matapang si Mark. Malakas ang kanyang loob, kaya hindi nanghina ang kalooban niya sa kabila ng kanyang kalagayan.
Talagang hahanga ka rin kay Mark Gil.
SHOW NA MAKIKIPAGSABAYAN SA NAKED TRUTH, POSIBLENG KUMAIN NG ALIKABOK
MAGKASUNOD nga kasi eh, at halos pareho sila ng gimmick kaya naikukompara iyong Naked Truthng Bench doon sa isa pang fashion show na ang attraction din ay mga male model.
Pero halos lahat ay nagsasabi na baka iyong isa ay kumain ng alikabok sa show ng Bench. Kasi nga lahat halos ng mga sikat na celebrities at models lalabas sa Bench, samantalang doon sa kabila, ang sabi nga nila ay mukhang walang sikat kundi “puro starlets lang”.
Tiningnan nga namin ang sinasabing line up ng dalawang shows, at mukha ngang mas maraming stars sa Bench. At saka sa Bench, maraming mga home talent kagaya halimbawa ni Richard Gomez na hindi mo rin malaman baka biglang lumitaw kung kinakailangan. After all siya ang unang-unang endorsement ng Bench, at hanggang ngayon ay endorser pa rin siya ng kompanya.
Mahirap talagang sabayan iyang mga show ng Bench.
