HATAW! D'yaryo ng Bayan hatawtabloid.com
GINILITAN at ibinalot sa sako ang babaeng pipi’t bingi ng kanyang live-in partner nang magtalo sila kamakalawa ng gabi sa Caloocan City.
Patay na nang matagpuan sa ilalim ng hagdan ang nakasakong biktimang si Mary Joy Rodriguez, 20, ng 16383 Magnolia St., Barrio San Lazaro, Brgy. 187, Tala ng nasabing lungsod, sanhi ng malalim na sugat sa leeg mula sa itak.
Habang kusang loob na sumuko ang suspek na kinakasama ng biktima na si Reynaldo Anova, 21, nahaharap sa kasong homicide, at nakapiit na sa detention cell ng Caloocan Police.
Batay sa ulat nina POs2 Louelle Rabara at Mark Andrew Bartolome, dakong 11 p.m. nang mangyari ang insidente sa loob ng bahay ng dalawa.
Nagroronda ang mga tanod ng Barangay 187 nang lapitan sila ng ina ng suspek na si Ana Luz Anova at ipinagbigay-alam ang krimeng ginawa ng anak.
Agad nagresponde ang mga tanod at natagpuan ang nakasakong bangkay ng biktima.
Napag-alaman, habang nagtatalo ang dalawa ay hinataw ng taga ng biktima si Anova ngunit naagaw ng suspek ang itak kaya siya ang napatay. (ROMMEL SALES)
