1 pang pinay sa Vietnam nakapila sa bitayan

HINDI lang isa kundi dalawang Filipino ang pinakabagong napabilang sa death row sa Vietnam dahil sa pagpupuslit ng illegal na droga.

Sinabi ni Presidential Adviser on OFW Concerns at Vice President Jejomar Binay, bukod kay Emmanuel Camacho na nasentensiyahan ng kamatayan nitong Huwebes sa Hanoi, nahatulan din ng kaparehong parusa ang Filipina na si Donna Buenagua Mazon sa Ho Chi Minh City.

Si Camacho ay nahulihan ng 3.4 kilo ng coccaine habang nasa isa’t kalahating kilong coccaine ang nasamsam kay Mazon na parehong nahuli sa magkahiwalay na airport sa Vietnam noong Disyembre 2013.

Dahil dito, nanawagan ang Bise Presidente sa Department of Foreign Affairs na ayudahan ng legal na tulong ang dalawa dahil naniniwala silang maaari pang iapela ang kanilang sentensiya.

Kasabay nito ang panawagan sa mga Filipino na bumibiyahe abroad na huwag masilaw sa malaking halagang alok para maging drug mule o kasangkapan para magpuslit ng illegal na droga.