Palaboy namatay o nagpakamatay?

INIIMBESTIGAHAN ng Manila Police District-Homicide Section (MPD-HS) ang pagkamatay ng isang palaboy na natagpuang bumubula ang bibig sa Sta.Cruz, Maynila kahapon ng umaga.

Inilarawan ni SPO3 Glenzor Vallejo, imbestigador ng MPD-HS, ang biktimang nasa edad 45-50, nakasuot ng asul na polo at  puting short na may stripes na itim.

Dakong 6:15 a.m. nang makatanggap ng tawag ang MPD-HS kaugnay sa pagkakatagpo sa biktima sa Rizal Avenue at Alvarez St., Sta. Cruz.

Ayon kay Vallejo, walang sugat na nakita sa katawan ng biktima maliban sa pagbula ng kanyang bibig.

“Hihintayin namin ang autopsy report ng SOCO kung nagpakamatay ang biktima sa pamamagitan ng pag-inom ng silver cleaner o inatake,” pahayag ni Vallejo.

Huling nakitang buhay ang biktima kamakalawa 7:00 p.m., na binati ng isang jeepney driver.

Napag-alaman na hindi nangangalakal at tambay lamang sa lugar ang biktima.

(LEONARD BASILIO/may karagdagang ulat ni John Bryan Ulanday)