Sanggol ibinalibag sa baldosa tigok

DAGUPAN CITY – Sapilitang kinuha ng isang 34-anyos lalaking may diperensiya sa pag-iisip ang isang taon gulang na sanggol mula sa kanyang ina at patiwarik na ibinalibag sa baldosa.

Pagkaraan ay mabilis na tumakbo ang suspek ngunit hinabol ng mga barangay tanod sa Brgy. Bacnono, Bayambang, sa lalawigan ng Pangasinan.

Ayon sa ulat, karga ng ina ang batang si Shaira Mae Arenas nang biglang agawin ng suspek ang bata saka ibinalibag sa baldosa.

Habang sinabi ng ina ng suspek, nakawala sa kadena ang kanyang anak na matagal nang may karamdaman sa pag-iisip.

Nagsimula aniya ito nang iwanan ng kanyang asawa at anak ang suspek.

Samantala, ilang oras makaraan isugod sa ospital ay pumanaw ang sanggol bunsod ng matinding pinsala sa katawan at ulo.

Ang suspek ay dinala ng pulisya sa kustodiya ng Social Welfare and Development Office ngunit ibinalik din sa kanyang pamilya.

Sa ngayon bagama’t pinalaya ang suspek, sinampahan siya ng kaso at ipinaubaya na sa korte ang desisyon.

(BETH JULIAN)