Binoe, magpa-fire dance sa Talentadong Pinoy

NABANGGIT ni Mariel Rodriguez na sana walang kumain ng blade o bubog sa mga contestant ng Talentadong Pinoy na mapapanood ngayong Sabado dahil baka raw gayahin ng asawang si Robin Padilla tulad ng panggagaya nitong nag-stunt gamit ang mga kurtina sa pilot episode nito.

Kaya naman tinanong namin ang kaibigan naming taga-TP kung sino-sino ang contestants nila ngayong Sabado at kung ano-ano ang talents nila.

Kuwento sa amin, “Fat Hot Mommas po, mommies na comedy bar talents at “bigatin” na magpapamalas ng galing sa pagsasayaw;  May Extreme magician na ilang beses siyang nag-audition sa ‘TP’ dahil sa kagustuhan niyang maipamalas ang galing and, finally, makikita na siya ng sambayan sa stage; Fire Dancer – ang babaeng literal na magpapa-init sa stage sa makapigil hinga niyang pagfa-fire dance; at ang Light Production – grupo ng mga kabataang mula Pasig na bumabangon mula sa pagkakasalanta ng Bagyong Ondoy at ngayon ay magpapakita ng galing gamit ang ilaw.”

Wala naman palang delikadong bagay na gagawin ang contestants ngayong Sabado kaya tiyak na hindi ninerbiyoain si Mariel.

Kung talagang kasama sa usapan nina Binoe at TP ang magpakitang gilas siya sa opening ng programa ay malamang ang fire dance o trying hard magician ang gagawin ng action star dahil imposibleng gayahin niya ang hot mommies na sasayaw at ‘yung light production na kumakanta.

Anyway, sina Lani Misalucha, Bayani Agbayani, at Tessa Prieto ang judges/talent scouts din.

ni Reggee Bonoan