Padaca muling kinasuhan sa Ombudsman

SINAMPAHAN ng kaso sa Ombudsman si dating Commission on Elections (Comelec) Commissioner Grace Padaca ng kanyang kababayang abogado sa Naguilian, Isabela, dahil sa hindi pag-file ng kanyang Statement of Assets and Liabilities and Networth (SALN) noong siya ay gobernador ng Isabela.

Ang kasong paglabag sa Section 1, Rule 7 ng Republic Act 6713 o Code of Conduct and Ethical Standards for Public Officials and Employees ay isinampa sa Ombudsman for Luzon ni Atty. Francisco Ignacio Ramirez III.

Si Atty. Ramirez ay dating Provincial Legal Officer ng Pamahalaang Panlalawigan ng Isabela at nakatatlong termino bilang mayor ng Naguilian, Isabela.

Si dating Comelec Commissioner Padaca ay tubong Minanga, Naguilian, Isabela.

Kabilang sa mga ebidensiya ni Atty. Ramirez sa isinampang kaso sa Ombudsman laban kay Padaca ay ang certification ni Human Resource Management Officer (HRMO) Hortencia Galapon ng Isabela Provincial Government, nakasaad na walang inihaing SALN si Padaca mula 2005 hanggang 2009, panahon ng kanyang panunungkulan bilang gobernador ng Isabela.

Batay rin sa record na nakuha ni Atty. Ramirez, ang SALN ni dating Commissioner Padaca mula 2007 hanggang 2010 ay inihain lamang niya sa Deputy Ombudsman for Luzon noong Hulyo 12, 2013.

Kung maaalala, ang SALN ni dating governor Padaca ang isa sa mga hinanap ng Commission on Appointments (CA) nang talakayin ang kanyang kompirmasyon bilang commissioner ng Comelec.

Na-bypass sa CA si Padaca at hindi na binago ni Pangulong Benigno “Noynoy” Aquino III ang kanyang ad-interim appointment bilang Comelec commissioner.

(HNT)