HATAW! D'yaryo ng Bayan hatawtabloid.com
NAGSAGAWA ng kilos-protesta ang grupong United Makati Against Corruption (UMAC) sa Senate habang dinidinig ang kaso ng mag-amang Binay na tongpats upang pabilisin ang special COA Audit sa Makati City Parking Building na P2.7-bilyon parking building.
Ito ang ikinanta sa Senado ni dating Makati Vice Mayor Elmer Mercado na umaming P1.2 bilyon ang halaga ng Parking Building at hindi P2.7 bilyon tulad ng sinasabi ng pamilya Binay.
Si Mercado ay nagsilbing Vice Mayor ng Makati noong Mayor pa lamang ng siyudad si Vice President Binay.
Sa pagdinig ng Senate Blue Ribbon Committee, inamin ni Mercado na personal siyang nakinabang sa tongpats mula sa implementasyon ng Phase I at Phase II ng Makati Parking Building.
“Kung ang Vice Mayor ay nakinabang, lalo na po ang Mayor. Imposibleng hindi nakinabang ang Mayor,” ani Mercado.
“Iyan po ang kalakaran sa Makati,” aniya.
Sinabi ni Mercado na nagulat siya nang malaman niya mula sa pagdinig ng Senate Blue Ribbon Committee na umabot na sa P2.7 bilyon ang pondong inilaan ng Makati city government para sa pagpapatayo ng Parking Building.
Sa kanyang pagkakaalam, ani Mercado, hindi lalampas sa P1.2 bilyon ang pondong gugugulin para matapos ang pagpapatayo ng Parking Building.
“Sa presyong ito, tapos na dapat ang building at kasama na dapat ang bayad sa arkitekto at fixtures,” paliwanag ni Mercado.
“Kaya nga na-shock ako nang malaman ko na lumobo na ang presyo ng Parking Building sa P2.7 bilyon,” dagdag niya.
Dahil sa kanyang pasabog, inalok ni Sen. Antonio Trillanes si Mercado na ipasailalim sa Witness Protection Program kasama ni Atty. Renato Bondal at Nicolas Enciso.
Sina Bondal at Enciso ang nagsampa ng kasong plunder sa Ombudsman laban kay Vice President Binay, Makati Mayor Jejomar Erwin “Junjun” Binay at ibang opisyales ng Makati kaugnay ng overpricing sa Parking Building.
Sinabi ni Mercado bagama’t natatakot siya sa kanyang seguridad, pag-iisipan pa niya kung tatanggapin niya ang alok ni Sen. Trillanes.
“Mula nang magkahiwalay kami ni VP Binay, may mga sasakyan nang palaging sumusunod sa akin. Kung anoman ang mangyari sa akin, nag-iwan na ako ng sulat sa aking pamilya para malaman nila kung ano ang nagyari sa akin,” paliwanag ni Mercado.
Inamin ni Mercado na matalik silang magkaibigan ni Vice President Binay at parang magkapatid na ang turingan nila.
“Prinsipyo ang dahilan kung bakit kami nagkahiwalay. Bayan na ang nakasalalay dito at walang politika rito,” diin niya.
Samantala, kinompirma ng Presidente ng Philippine Institute of Architects na si Feredico Colcol ang valuation ng kilalang appraiser na si Federico Cuervo na pumapatak lamang sa P23,000 kada square meter o P700 milyon ang nararapat na halaga ng pagpapatayo ng Makati carpark building at masyadong mataas sa P2.7 bilyon.
Hindi dumalo sa pagdinig si Mayor Junjun Binay.
HATAW News Team
