Princess Ella magiging kontender

Agarang nagresponde ang kabayong si Princess Ella nang bibuhan ng husto ng kanyang hinete na si John Alvin Guce sa idinaos na 2014 PHILRACOM “Ist Leg, Juvenile Fillies/Colts Stakes Race” nitong nagdaang Linggo sa pista ng Sta. Ana Park.

Ayon sa aking basa at naobserbahan sa nasabing kabayo ay kaya siyang maisunod muna sa ayre ng kanyang makakalaban at kapag oras na hingan ay may buong tapang siyang rumemate pagsungaw sa rektahan.

Kaya kahit pa naging maikli ang naging labanan ay tiyak na magiging isa siya sa magiging kontender para sa grupo ng mga Juveniles (2YO). Naorasan ang tampok na pakarerang iyan ng 0:59.2 (13-21′-25) para sa distansiyang 1,000 meters.

Sa naganap naman na “NPJAI – Mr. George Y. Stribling Trophy Race” ay bumanderang tapos ang kabayo ni Ginoong Patrick Uy na si Señor Patrick na pinatnubayan ni Pati Dilema.

Sa largahan ay buong lakas na kinuha ni Pati ang unahan at hindi na pinaporma pa ang nakalaban niyang top choice na si Rio Grande ni Jeff Zarate hanggang sa makarating sila sa meta. Tumapos naman ang karerang iyan ng tiyempong 1:00.8 (13-22-26′) sa pareho din na distansiya.

Mainam na bantayan ang pumangatlo sa kanila na si Pusang Gala kapag medyo humaba o sa mas mahaba pang distansiya, dahil pagdating sa pagremate ay masasabi kong matulis siyang kumamot sa kanyang ultimo kuwartos.

Fred L. Magno