Ang sarap…tampok sa Gandang Ricky Reyes

BASTA masarap, tiyak na nakaliligaya. At sa Sabado,9:00-10:00 a.m. itatampok sa programang Gandang Ricky Reyes, Todo Na Toh (GRR TNT) ang mga bagay na nakabubusog tulad ng pagkain, musika, at paraan ng pampakinis ng balat at wastong ehersisyong pang-kalusugan.

Music lover si Mader Ricky at nakagawian na niyang pagdating sa bahay matapos ang iba-ibang gawaing hinaharap ay nakikinig ng awitin ng mga paboritong singer. Isa na rito’y ang grupong Freestyle na nagkamit na ng maraming karangalan sa mga pinasikat na record albums dahil sa balanseng timplado ng kanilang pinagsamang boses at mga sarili nilang komposisyon.

Abangan sa GRR TNT na prodyus ng ScriptoVision ngayong Sabado sa GMA News TV ang eksklusibong panayam ni Mader sa sikat na grupong tinutularan ngunit ‘di mapantayan.

Dadalhin din tayo ng beauty guru sa isang kainan na dinarayo dahil sa lutong-bahay na sardinas at corned beef. Sisilip din tayo sa Skin Rejube na dinarayo ng mga nagnanais manatili ang makinis na kutis. Makiki-birthday party pa tayo sa dating Beauty Queen-aktres na si Maria Isabel Lopez. Iba talaga ang trip niya. Sa halip na masayang sayawan at masaganang inuman at kaina’y dinala niya ang mga kaibigan sa isang SPA na tunay na nasiyahan at umuwing nakapagrelaks. Ikaw na talaga, Maria Isabel !

Kinatatakutan ng mga lalaki’t babae ang sakit na Alopecia o pagnipis at pagkalugas ng buhok. Tutok lang sa show para malaman kung may natuklasan na bang lunas sa pesteng sakit na ito. Alamin din kung ano ang iniregalo ni Mader sa isang babaeng may ganitong sakit.