HATAW! D'yaryo ng Bayan hatawtabloid.com
BACOLOD CITY – Patay ang isang lalaki sa lalawigan ng Negros Occidental makaraan magpabunot ng ngipin sa isang faith healer kamakalawa.
Kinilala ang biktimang si Jerry Aguirre, 28, residente ng Brgy. Punta Mesa, Manapla.
Batay sa salaysay ng kapatid ng biktima na si Jona Dela Cruz, isang guro, humingi sa kanya ng pera ang kapatid para magpabunot ng ngipin ngunit lingid sa kanyang kaalaman ay sa faith healer na Diosdado Mahilum nagtungo ang biktima.
Nagulat na lamang siya kinaumagan nang matagpuan ang kapatid sa silid na wala nang buhay.
Batay sa findings ng kanilang municipal health officer, namatay ang biktima dahil sa septic embolism o infection at blood poisoning.
Napag-alaman, limang ngipin ang ipinabunot ng biktima, dalawa sa ibaba at tatlo sa itaas.
Pinaniniwalaang naengganyo ang biktima na sa faith healer magpabunot ng ngipin dahil sa murang serbisyo kung magpapagawa rin ng pustiso.
Si Mahilum ay kilalang gumagawa ng pustiso at bumubunot din ng ngipin bagama’t walang lisensiya bilang dentista.
Pinaghahanap ng pulisya si Mahilum makaraan ireklamo ng kapatid ng biktima.
ni BETH JULIAN
