Cone Coach of the Year

PARARANGALAN ng PBA Press Corps sina San Mig Coffee coach Tim Cone at San Miguel Corporation president at chief operating officer Ramon S. Ang sa Annual Awards night na gaganapin mamayang 7 pm sa Richmond Hotel sa Eastwood, Libis, Quezon City.

Si Cone ay nahirang bilang Coach of the Year at tatanggapin niya ang Baby Dalupan award. Si Ang naman ang Executive of the year at tatanggapin niya ang Danny Floro citation.

Kasama ni Cone na pararangalan si Paul Asi Taulava na tatanggap ng Comeback Player of the Year award buhat kay William “Bogs” Adornado.

Naihatid ni Cone sa Grand Slam ang Mixers sa 39th season ng Philippine Basketball Associiation.

Iyon ang kanyang ikalawang Grand Slam . Una niyang nabuo ang Triple Crown noong 1993 habang hawak pa ang Alaska Millk.

Matapos ang mahigit dalawang dekada ay iniwan ni Cone ang Aces at lumipat sa San Mig Coffee na naihatid na niya sa limang kampeonato.

Inimbitahan bilang special guests upang magbigay ng ilang pangungusap para kay Cone na nakabuo ng kanyang ikalawang Grand Slam sina Atoy Co at Philip Cezar ng Cispa, Samboy Lim, Hector Calma at Renato Agustin ng San Miguel Beer at Jojo Lastimosa at Dickie Bachmann ng Alaska Milk.

Pararangalan din sina Marc Pingris bilang defensive Player of the Year, Peter June Simon bilang Mr. Quality Minutes, Jayson Castro bilang Scoring champion, Mark Barroca para sa Order of Merit matapos magwaging Player of the Week ng tatlong beses at sina Greg Slaughter, Ian Sangalang, Raymond Almazan, Justin Melton at Terrence Romeo bilang mga miyembro ng All-Rookie team.

Dadalo sa pagtitipon sina incoming PBA chairman Pato Gregorio, commissioner atty. Chito Salud, Robert Non, Rene Pardo at mga miyembro ng PBA Board of Governors.

Sabrina Pascua