Kim, wala raw pinaghuhugutan, pinag-aaralan lang mabuti ang character

ni Dominic Rea

HINDI na rin matatawaran ang pagiging isang magaling na aktres ni Kim Chiu.

Napakarami na rin ang kanyang nagampanang papel sa pelikula at telebisyon at nasubaybayan natin kung paano pinalago ni Kim ang kanyang karera.

Sa husay niyang ipinakita sa unang yugto ng seryeng Ikaw Lamang ay napakarami ang pumuri sa kanyang ipinamalas na pagganap bilang si Isabelle na bugbog sarado sa asawang si Franco(Jake Cuenca) bitbit pa ang problema sa kanyang pamilya. Paano nga ba ito hinuhugot ni Kim?

“Basta everytime po na eksena ko na, kailangang in-character na ako, ibinibigay ko talagang best ko, pinag-aaralan kong mabuti ang script ko. Ayun, effective naman siya and sobrang thankful kami sa mga director namin sa serye. Wala namang pinaghuhugutan. Ginagawa ko lang ang dapat makita sa amin ng televiewers,” paglalahad pa ni Kim.

In fairness kay Kim, she’s so intact sa mga gusto niyang gawin sa kanyang buhay. Mahal na mahal ni Kim ang kanyang career at wala nang mahihiling pa ang sikat na Primetime Princess kundi ang patuloy na pag-usbong ng kanyang karera!

‘Yun na!