HATAW! D'yaryo ng Bayan hatawtabloid.com
PAGKATAPOS ng All-Star Game noong Sabado, balik-aksyon sa Miyerkoles ang NCAA Season 90 sa pagsisimula ng second round ng eliminations sa The Arena sa San Juan.
Maghaharap sa tampok na laro sa alas-4 ng hapon ang Arellano University at San Sebastian College.
Tabla sa unahan ang Chiefs kasama ang defending champion San Beda College na parehong may pitong panalo at dalawang talo.
Ang Stags naman ay katabla ang Letran at Emilio Aguinaldo College sa parehong 3-6 na talaan.
Unang maglalaban naman sa alas-2 ang Red Lions at ang kulelat na Mapua Cardinals na may isang panalo lang kontra sa walong talo.
Kagagaling lang ng San Beda sa masakit na 64-53 na pagkatalo kontra Letran noong Miyerkoles kung saan ibinangko ni coach Boyet Fernandez ang dayuhang sentrong si Ola Adeogun dahil sa hindi niya pagsipot sa ensayo.
Samantala, tinalo ng NCAA East ang NCAA West, 104-97, sa All-Star Game ng liga noong Sabado sa tulong ng 12 puntos ni Art de la Cruz at 11 naman mula kay Juneric Baloria.
Nagwagi sa three-point shootout si Travis Jonson ng College of St. Benilde samantalang dinomina ni Arnaud Noah ng San Beda ang slam dunk event.
Pinalitan ni Noah si Adeogun na umatras sa huling sandali.
Lalaro si Noah sa Red Lions sa 2016 season kapag nagtapos na si Adeogun sa kanyang eligibility at pag-aaral.
(James Ty III)
