Justices, transparent sa SALN (Bwelta kay PNoy ng SC)

BINUWELTAHAN ng Korte Suprema ang mga pasaring ni Pangulong Benigno “Noynoy” Aquino III laban sa justices na dapat maging transparent at maglabas din ng kanilang statement of assets, liabilities and net worth (SALN).

Magugunitang ibinasura ng Supreme Court en banc kamakailan ang hirit ni BIR Commissioner Kim Henares na makakuha ng kopya ng SALN ng mga mahistrado mula 2003 hanggang 2012.

Tahasang sinabi ni Supreme Court spokesman Theodore Te, transparent ang justices sa kanilang mga kayamanan at handang ilabas ito sa mga nagnanais, sa kondisyong alinsunod sa hinihinging administrative requirements ng hukuman.

“Contrary to what has been reported, the SC Justices have not only been complying with the requirements on the SALN but have made these available upon compliance with the reasonable administrative requirements imposed by the Court,” ayon kay Te.

Katunayan, ilalabas aniya ng hukuman sa Lunes ang talaan ng mga taong nabigyan ng kopya ng SALN ng justices.

Binigyang-diin ni Te na maging ang miyembro ng media at sino mang nagnanais ng kopya ng SALN ng mga mahistrado ay maaring magkakaroon nito.

Nagkaroon ng iringan ang Malacañang at ang Korte Suprema makaraan ideklara ng hukuman na labag sa Saligang Batas ang ilang bahagi ng kontrobersiyal na Disbursement Acceleration Program (DAP).

Dahil sa naturang isyu, sinasabing paraan ng Malacañang na bweltahan ang mga mahistrado ng kataastaasang hukuman sa pamamagitan ng pagbusisi ng kanilang SALN. (HNT)