HATAW! D'yaryo ng Bayan hatawtabloid.com
ni Roldan Castro
NATAPOS na kahapon ang afternoon seryeng umakit sa puso ng mga manonood, ang Moon of Desire, kaya naman natuldukan na rin ang love story nina Tilda at Nolan, o mas kilala sa tawag na TiNola nina Beauty Gonzalez at Franco Daza.
Talaga namang naging matagumpay ang love team ng dalawa at masugid na tinangkilik, lalo na ng netizens, ang kanilang kuwela at mapanuksong mga kiligan.
Kaya naman ganoon na lang ang pasasalamat nina Franco at Beauty sa fans at kung bibigyan umano ng pagkakataon ay nais pa nilang ipagpatuloy ang kanilang team-up sa ibang proyekto sa telebisyon man o pelikula.
“Sana talaga maipagpatuloy ang love team namin. Bakit naman hindi ko gugustuhing makatrabaho uli si Beauty? She is an awesome person,” sabi ni Franco.
Nang tanungin kung ano ang mami-miss nila sa isa’t isa, tahasang sinagot ng pinakabagong Kapamilya hunk na “wala.
“Wala akong mami-miss kasi alam ko na walang magbabago sa pagkakaibigan at magpapatuloy pa rin ito kahit tapos na ang serye.”
Para naman sa bagong pantasya na si Beauty, “Mami-miss ko siyembre ‘yung madalas na biruan at kulitan namin ni Franco sa set.”
