HATAW! D'yaryo ng Bayan hatawtabloid.com
CEBU CITY – Patay ang 2-anyos sanggol nang gilitan sa leeg ng kanyang ama matapos makipag-away sa kanyang misis dakong 6 a.m. kahapon sa Villagonzalo, Brgy. Tejero, Lungsod ng Cebu.
Kinilala ang biktimang si Jasel Ompad, habang nakapiit na sa himpilan ng pulisya ang ama niyang si Robert Ompad, 27, construction worker, sinasabing may nervous breakdown.
Ayon kay SPO1 Victor Ayuman ng Cebu City Police Office, nag-away ang suspek at kanyang misis sa maliit na bagay lamang.
Sa tindi ng bangayan ay umiwas na lamang ang ginang at umalis.
Ngunit lingid sa kaalaman ng ginang, kumuha ng kutsilyo ang suspek, kinarga ang anak na naglalaro sa kanilang sala saka dinala sa pintuan.
Nagulat ang mga kapitbahay nang makitang biglang ginilitan ng ama sa leeg ang sanggol.
Mabilis na nagresponde ang mga pulis ngunit patay na ang sanggol nang kanilang abutan.
(BETH JULIAN)
