HATAW! D'yaryo ng Bayan hatawtabloid.com
MAHIGIT 50 ang sugatan makaraan mawala sa kontrol ang depektibong bagon ng Metro Rail Transit at sumalpok sa Taft Avenue station wall sa Pasay City kahapon.
Kabilang sa mga sugatan ang mga pasahero ng train gayon din ang ilang pedestrian sa kanto ng EDSA at Taft Avenue, na tinamaan ng debris.
Ayon sa ulat, 10 katao ang dinala sa San Juan de Dios Hospital, habang 22 ang dinala sa Pasay City General Hospital, at tatlo sa Adventist Medical Center.
Inihayag ng isa sa mga pasahero ng MRT train, kinabahan ang mga pasahero nang magkaroon ng spark sa train habang dumaraan sa Magallanes station sa Makati.
Napag-alaman, bago naganap ang insidente, ilang pasahero ang bumaba sa depektibong bagon, na may body number 003-B.
Ayon kay Pasay City Police Chief Sr. Supt. Florencio Ortilla, dakong 3:30 ng hapon nang mangyari ang insidente sa nasabing lugar.
Galing ang naturang train sa Magallanes, Makati City Station patungo ng EDSA-Taft Avenue station, ngunit tumirik ito sa alanganing lugar na posibleng dahil sa pagkawala ng power nito.
Ngunit hindi maaaring ibaba ang mga pasahero ng naturang bagon dahil sa alanganin ang lugar.
Bunsod nito, ipinahila ito sa ibang bagon ngunit kumalas ang coupling o dugtungan habang hinihila hanggang dumeretso sa intersection ng (EDSA-Taft Avenue station, Pasay City) at pinatumba ang ilang poste ng koryente saka sumalpok sa barrier.
Napag-alaman, isa sa mga poste ng koryenteng natumba ay bumagsak sa isang sport utility vehicle (XJH-655).
ni JAJA GARCIA
