HATAW! D'yaryo ng Bayan hatawtabloid.com
SA DAGITAB-BOMBILYA NAKILALA NI LIGAYA SI DONDON SABAY LABAS NA HUMAHAGULHOL SA VIP ROOM …
Kinuha niya ang kanang kamay ng da-ting nobya na nakapatong sa kanyang hita.
“Maximiano” ang nadampot niyang pangalan sa pakikipagkamay kay Ligaya.
Naudlot ang pagtawa ng babaing pinag-uukulan niya ng walang kupas na pagmamahal. Pamilyar kasi sa kanilang dalawa ang pangalang Maximiano, ang may-ari ng junk shop sa Dimasalang. At hindi nito basta-basta makalilimutan ang pangalang ‘yun dahil lagi silang dinadaya noon ni “Mang Maxie” sa pagtitimbang ng ibinebenta nilang kalakal.
“M-Maximiano?” ang nasabi ni Ligaya sa mahinang tinig.
Pamaya-maya ay dumating na sa VIP room ang may dala ng pulutan at inumin na inorder ni Dondon. Sinindihan ng waiter ang munting bombilya sa tapat ng mesang inookupahan nina Dondon at Ligaya upang magpapirma ng chit.
Biglang napapitlang sa kinauupuan si Ligaya. Mabilis itong napatayo. Naging maagap naman si Dondon sa pagpigil sa kamay ng dating nobya. Pero pilit nitong binaklas ang kanyang mga braso sa pangya-yakap niya. At umiyak ito na parang isang aping-api.
“Ba’t narito ka? Gusto mo ‘kong ipahiya? Gusto mo ‘kong insultohin?” pagbibintang ni Ligaya kay Dondon.
“H-hindi ko magagawa ‘yun sa ‘yo, ‘Gaya… M-Mahal pa rin kita!” ang naibulalas ng kanyang damdamin.
“Kinalimutan na kita!” sabi ni Ligaya sa matigas na tono.
“Hindi ako naniniwala…” ang maagap na tugon ni Dondon sa babaing itinatangi.
“Pwes, manigas ka!” anito sabay talikod sa kanya.
Dinig ni Dondon ang pahagulgol na pag-iyak ni Ligaya na patakbong lumabas ng VIP room. Hindi niya ito sinundan para hindi magkaroon ng eskandalo. Pero may plano siyang sundan sa pag-uwi ang dating katipan. Aalamin na lamang niya ang address nito upang doon ay malaya silang dalawa na makapag-usap. At kung talagang kinakailangan ay nakahanda siyang suyu-suyuin ito upang patunayan ang kawagasan ng kanyang pag-ibig.
Sinundan ng traysikel na sinakyan nina Dondon at Popeye ang traysikel na naghatid kay Ligaya sa isang komunidad sa Cainta. Nangungupahan pala ang dalaga sa isang maayos-ayos na apartment. Kasambahay nito roon ang isang GRO na kasamahan sa club. Ito ang nakipagharap sa kanila ng kanyang runner-alalay sa gate ng paupahang tirahan. (Itutuloy)
ni Rey Atalia
