HATAW! D'yaryo ng Bayan hatawtabloid.com
ni Cesar Pambid
SINORPRESA ni Dingdong Dantes si Marian Rivera nang alukin nito ng kasal national television ang aktres.
Present sa okasyon ang pamilya ng dalawa. Kumbidado rin sa naturang event ang maraming Dongyan fans na nagtitilian dahil sa kilig.
Nauna rito, inintriga pa ng programa ang publiko sa pamamagitang ng mahabang anunsiyo sa pamamagitan ng hash tag na #lastdance.
Opisyal na ngang fiancee ni Dingdong si Marian. Yes, nagpahayag na ng kagustuhang pakasalan ni Dingdong ang kung ilang taon niyang katipan.
Sa huling segment ng show, inalala nina Dingdong at Marian ang ilang mahahalagang kaganapan ng kanilang relasyon kasama ang ilang kaarawan nilang dalawa.
Pati na ‘yung travel nila sa USA at ‘yung pagdadala ni Dingdong kay Marian, kasama ang pamilya sa isang butterfly garden sa Macau.
Ayon kay Dingdong special kay Marian ang mga paro-paro kung kaya roon niya ito dinala.
Sa puntong ito, marami pang inalala si Dingdong na ikinatulo ng luha dahil sa kaligayahan ni Marian.
At bago lumuhod si Dingdong upang opisyal na ipahayag ang nilalaman ng kanyang puso, sinabi ni Dingdong na mahal na mahal niya si Marian kaya’t lalong napaiyak ang aktres.
Sa kanyang pagluhod naglitanya pa ng mga pangungusap ng pagmamahal si D|indong, “dahil ikaw ang babaeng nagpaligaya sa akin ng mahabang panahon, dahil ikaw ang babaeng ibinigay Niya sa akin, dahil ikaw ang sagot sa aking mga dasal na sana, tunay na magmahal sa akin, ikaw na talaga ang taong gusto kong makasama habambuhay,” at saka kinuha ang singsing sa bulsa, inialay kay Marian at sabay sabing “will you be my wife?”
Matapos ang proposal, kinausap naman ng host na si Paolo Ballesteros ang mga nanay ng dalawa, pati na ang lola ni Marian kung ano ba ng kanilang naramdaman.
“Salamat sa pagpapaligaya mo sa aking anak,” sabi ni Mrs. Dantes. “Kung saan masaya ang anak ko, roon ako,” sabi naman ng nanay ni Marian. “Bigyan n’yo na ako ng mga apo,”pahayag naman ni lola.
Towards the end of the show, nakunan pa ng mensahe ang Spanish dad ni Marian na nagpahayag ng consent sa katagang Espanol.
Ito naman ang naging pahayag ni Marian, “salamat sa tunay mong pagmamahal, salamat, nakahanda na ako, bibigyan kita ng maraming anak, kahit ilan ang gusto mo, lumaki man ang katawan ko, wala akong pakialam basta maibigay ko ang kaligayhan mo!”
“Is that a yes?” pakli ni Dingdong, tumango lang si Marian na tumutulo ang luha at saka sila nagyakap nang mahigpit.
“Ngayon siguro, naiintindihan na ninyo kung bakit nagpa-tattoo ako ng paro-paro sa likod ko, dahil sa paro-paro, we became united!” huling salita pa ni Marian.
