HATAW! D'yaryo ng Bayan hatawtabloid.com
UNANG magkakasubukan ang San Miguel Beer at Rain or Shine sa pagsisimula ng pre-season series ng Philippine Basketball Association na Liga ng Bayan sa Setyembre 12 sa Angeles, Pampanga simula alas-6 ng gabi.
Ito ang magiging unang laro ng bagong head coach ng Beermen na si Leo Austria.
Sa Oktubre 4 ay magkakaroon ng double-header sa Alonte Sports Arena sa Binan, Laguna kung saan maghaharap ang Kia Motors ni Manny Pacquiao kontra Blackwater Sports sa alas-3 ng hapon at ang Grand Slam champion San Mig Super Coffee kontra North Luzon Expressway sa alas-5.
Kinabukasan ay maglalaban ang Barangay Ginebra San Miguel kontra sa Meralco Bolts ni bagong coach Norman Black sa Panabo, Davao Del Norte.
Sa Oktubre 10 ay lalaro sa Puerto Princesa, Palawan ang Alaska at Barako Bull na ang promoter nito ay ang dating board governor ng Powerade/Coca-Cola na si Atty. JB Baylon.
Sa Oktubre 11 ay magsasagupa ang Bolts at Beermen sa Blue Eagle Gym sa loob ng kampus ng Ateneo de Manila University sa Lungsod Quezon.
At sa Oktubre 12 ay magbabanggaan ang Talk n Text at Globalport sa Legazpi, Albay.
Ang mga larong ito ay bahagi ng paghahanda ng pagbubukas ng bagong PBA season sa Oktubre 19.
“Regalo natin sa mga fans ‘yan. Alam naman natin kung gaano sila nasabik sa mga laro,” wika ni PBA Media Bureau Chief Willie Marcial.
Ni JAMES TY iii
