Kumusta Ka Ligaya (Ika-13 labas)

PINUTOL NI LIGAYA ANG KOMUNIKASYON SA KANYA, NATIMBOG SI BONG HELICOPTER, UMALAGWA SI DONDON

Ayaw sagutin ni Ligaya ang mga pagtawag niya sa cellphone. Hindi rin nagre-reply sa kanyang mga text. At bandang huli ay “not yet in service …” na ang cp na kinikontak niya. Labis niyang ikinabahala iyon. Nag-alala siya sa kalagayan ng katipan na nabiktima ng malupit na kapalaran. “Narito ako, nagmamahal sa iyo… Mahal na mahal kita. Nasaan ka? Pupuntahan kita kung saan ka man naroroon ngayon,” ang mensahe niya sa text na nagpapahiwatig ng malasakit at tapat na pag-ibig sa dalaga.

Walang piyansa ang kasong rape. Napag-alaman ni Dondon na napiit sa city jail ang among Tsino ni Ligaya habang dinidinig ang isinampa nitong reklamo sa husgado. Pero kung saan man ito nanirahan ay wala pa rin siyang nababalitaan.

Lumipas ang maraming araw, linggo at buwan.

“Bigtime Pusher Timbog Sa PDEA.” Nakabandera ang mukha ni Bong Helicopeter sa pahina ng pahayagang tabloid. Sinasabi sa kaugnay na balita na nalambat ng mga maykapangyarihan si Helicopter sa isang buybust operation sa Sta. Cruz area…”

Ikinalungkot din ni Dondon ang pagkahoyo ng kanyang kakosa. Pero sa isang banda ay nagbukas iyon sa kanya ng malaking oportunidad sa pagsusuplay ng droga. Sa umpisa ay namuhunan muna siya nang pakonti-konti sa patingi-tinging pagbebenta niyon. Nag-solo flight sa distribusyon ng naka-sachet na shabu. At noon siya nagkamal siya ng limpak-limpak na pera.

Gayon man, sa paglabag sa batas ay minsan siyang natiyempohan ng isang grupo ng mga tiwaling pulis. Hindi nga siya tinuluyan dahil delihensiya lang naman ang lakad ng mga ito. Pero sabi nga ay naubos ang kanyang ‘pinagputahan.’ Pati kasi pe-rang itinatago-tago niya sa inookupahang entreswelo ay kanyang ‘naisuka.’

Balik si Dondon sa papiyait-piyait na pagtutulak. Pero sa tuwing makakaipon na siya nang malaki-laking halaga ay saka naman tinitimbog ng grupo ng mga gagong pulis. Nahalata niya kalaunan na ginagawa na siyang ‘gatasang baka’ ng mga bugok na may tsapa.

“Mainit ka na sa mga parak, Pards… “ naibulong kay Dondon ng cigarette vendor sa Recto na naabutan niya ng pangtsibug sa pananghalian.

“Pansin ko nga…” pagbubuntong-hi-ninga niya.

“Siguro’y dapat ka nang mag-iba ng tarima, Wala rin kasing mangyayari sa buhay mo kung magiging palabigasan ka na lang palagi,” ang naipayo sa kanya ng vendor.

(Itutuloy)

ni Rey Atalia