Cara y cruz sa lamay nagrambol (Mag-utol todas)

PATAY ang magkapatid nang pagsasaksakin ng hindi nakilalang suspek sa riot na naganap sa isang lamayan dahil sa sugal na cara y cruz sa Las Piñas City.

Namatay bago idating sa Las Piñas Distriat General Hospital ang magkapatid na Vincent Salido, 28, at Brando, 21, kapwa residente ng 169 Diamond St.,  Phase-5, BF Martinville, Barangay Manuyo Dos, Pasay City. Kapwa tadtad ng saksak sa iba’t ibang parte ng katawan ang magkapatid.

Dakong 10:30 p.m., nang maganap ang rambol sa isang lamayan sa sa kanto ng 6th  at Diamond Sts., Phase 5, BF Martinville, Barangay Manuyo  Dos.

Ayon sa saksing si John Kevin Clavero, kasama niya ang magkapatid at mga suspek na naglalaro ng cara y cruz, nang magkantiyawan sa taya.

“May sumuntok po sa akin, hindi ko alam kung sino kaya nagkaroon po ng labo-labo,”pahayag ni Clavero.

Ilang minuto ang nakalipas, nakitang duguang nakahandusay sa lupa ang magkapatid.

Ayon kay PO2 Christian Yanga, nagsasagawa sila ng follow-up operation kaugnay sa insidente upang makakuha ng impormasyon sa pagkakilanlan ng responsable sa krimen.

(JAJA GARCIA)