Azkals natanggalan ng pangil

NAKATUON ang Philippine Azkals sa Asean Football Federation Suzuki Cup, ang kanilang huling major tournament ngayong taon.

Pero bago mag-umpisa ang event, tatlong buwan mula ngayon ay mababawasan na ang kanilang ngipin dahil nagdesisyon ang top midfielder na si Fil-German Stephan Schrock na mag-resign sa national team kamakalawa ayon sa kanyang mga kaibigan.

Ang dahilan ng pag-alis sa team ng 27-anyos na si Schrock ay ang pagkakasali nito sa first team ng SPVgg Greuther Fuerth sa 2nd division ng German Bundesliga.

Nasilo sa Azkals si Schrock noong 2011 at sa 17 appearance ay nagpasok ng tatlong goals.

Tanggap naman ni Philippine Football Federation president Nonong Araneta ang desisyon ni Schrock.

Samantala, tuloy pa rin ang paghahanda ng Azkals para sa Suzuki Cup sa Nob. 22-Dis. 20.

ni ARABELA PRINCESS DAWA