Pintor utas sa hataw ng baseball bat

DALAWANG malakas na palo ng baseball bat sa ulo ang tumapos sa buhay ng isang pintor nang hatawin ng kanyang kaalitan sa Paco, Maynila, iniulat kahapon.

Patay agad ang biktimang si Danilo Pecayo, ng 1340 A. Burgos St. Paco, Maynila nang mapuruhan sa ulo ng stainless baseball bat.

Sa imbestigasyon ni SPO1 John Charles Duran, ng Manila Police District – Homicide Section, dakong 7:30 p.m., nang maganap ang insidente sa kanto ng Pedro Gil St., at President Quirino Avenue, sa Paco.

Ayon sa testigong si Justin Jazzie Pascua, 31, newspaper vendor, ng 1558 Figueroa St., nakita niya na nagbabatohan ang biktima at isang hindi nakilalang suspek na sinasabing empleyado ng Lawis Gym Equipment, sa nabangit na lugar .

“Nakita ko ‘yong lalaki may hawak na stainless bat, pabalik-balik na naglalakad na parang may hinihintay. Maya-maya nakita ko ‘yong biktima dumarating may kasamang tatlong lalaki, pinagbabato nila ‘yong suspek, pero nakailag kaya pinalo siya ng bat sa ulo,” ayon kay Pascua.

Sa lakas ng palo ng bat, natumba ang biktima, nang makitang babangon ay muling hinataw ng bat sa ulo kaya namatay.

Sinabi ni Pascua, may mga sinasabi ang suspek habang tumatakas pero sa salitang bisaya.

Inaalam ng mga awtoridad ang motibo ng pangyayari habang dinala sa St. Rich Funeral ang bangkay ng biktima para i-awtopsiya. (LEONARD BASILIO)