3-anyos kinidnap ng yayang bading

DUMULOG sa Manila Police District-General  Assignment and Investigation Section (MPD-GAIS) ang mga magulang ng tatlong-taon gulang na batang lalaki na dinukot ng kanyang bading na yaya sa Maynila, kamakalawa.

Ang magkarelasyong Jayson Jervoso, 30, at Jessel Lazarna, 28, kapwa ng 1222 BF Muñoz St., San Andres, Maynila ay lumapit kay PO3 Adonis Aguila, ng MPD-GAIS, upang i-report ang pagkawala ng kanilang anak na si Miguel, 3, matapos tangayin ng suspek na si Esmeraldo Operario, ng 2166 Calvin St., Singalong, Maynila.

Ayon sa mga magulang, dalawang buwan nang nagtatrabaho bilang yaya ang suspek nang tangayin ang bata.

Sa pagsisiyasat, nalaman ng pulisya na 10 taon hindi nakita sa kanilang lugar ang suspek dahil nanirahan sa Bicol at nang bumalik ay pumasok bilang yaya ng dinukot na bata.

Nabatid na tinangay din ng suspek ang cellphone at iPod ni Jervoso.

Walang maibigay na impormasyon ang mga kaanak ng suspek na tinukoy nilang bading.

(LEONARD BASILIO)