Mag-anak nalason sa paksiw na isda

PATAY ang isang ina at nasa malubhang kondisyon ang limang kasapi ng pamilya nang malason sa inulam na isda sa pananghalian sa Sagay City, Negros Occidental.

Matapos makaranas ng matinding pananakit ng tiyan, pagkahilo, at pagsusuka ay namatay ang biktimang si Elsie Bayona, 67, ng Hacienda Albina, Purok Kalubihan, Brgy. 1, sa nasabing lungsod.

Ang asawa ng namatay, na si Melchor, 64; mga anak na sina Ronilo, 33; Ronald, 29; at Maricel, 25; apong isang taon at siyam na buwang gulang ay ginagamot sa Vicente Gustilo Memorial District Hospital sa Escalante City dahil sa pananakit ng tiyan at pagsusuka.

Ayon sa pulisya, ipinaksiw ni Elsie ang isdang Tuloy na kanilang inulam sa pananghalian, makalipas ang ilang oras ay nakaramdam ng panghihina, pananakit ng tiyan ang pamilya.

Masusing sinusuri ang isdang inulam ng mga biktima upang malaman kung ito ang dahilan ng pagkalason ng mag-anak. (Beth Julian)