HATAW! D'yaryo ng Bayan hatawtabloid.com
NAGTAAS pa ng alerto ang Department of Health (DoH) nang pumalo na sa halos 800 ang bilang ng mga namamatay dahil sa Ebola virus.
Ito ay mula sa mahi-git 1,200 na bilang ng mga tinamaan ng naturang sakit.
Ayon kay DoH spokesman Dr. Lyndon Lee Suy, maituturing nang nakaaalarma ang halos 50-75 percent fatality rate para sa kahit anong sakit.
Dahil dito, nakikipagtulungan na ang DoH sa iba pang ahensiya ng pamahalaan upang matiyak na walang makalulusot na virus carrier sa ating bansa.
Una rito, katuwang na ng DoH ang World Health Organization (DoH) para sa paglaban sa nakamamatay na virus.
Sa ngayon ay nananatiling Ebola free pa rin ang Filipinas.
OFWs SA SIERRA LEONE, LIBERIA TODO-INGAT VS EBOLA OUTBREAK
TODO-INGAT ang mga Filipino sa Sierra Leone at Liberia sa West Africa kaugnay sa Ebola outbreak.
Ito ay sa kabila na ligtas sila mula sa nasabing virus.
Ayon kay Jonathan Tuazon, Jr., isang overseas Filipino worker (OFW) at empleyado sa isang mining company sa Sierra Leone, mahigpit pa rin ang kanilang pag-iingat at pagsunod sa preventive measures na ipinatutupad ng pamahalaan.
Ayon kay Tuazon, kompleto ang ibinigay na paalala sa kanila ng medical team ng kanilang kompanya at ginagawang regular ang monitoring sa kanilang temperature.
Dagdag pa niya, walang dapat ikatakot sa Ebola virus kapag sinusunod lang ang mga babala ng gobyerno tulad na lamang sa pag-iwas sa pakikipagkamay at pakikisalamuha sa mga lokal.
Bagama’t isolated ang kanilang kinalalagyan ay nag-iingat pa rin sila at hindi rin nagkompiyansa ang pamunuan ng kanilang kompanya.
