HATAW! D'yaryo ng Bayan hatawtabloid.com
ni James Ty III
IPINAKITA ni Rochelle Pangilinan ang bago at mas seksing pigura noong Linggo ng hapon nang siya’y nanguna sa autograph signing ng sikat na men’s magazine sa Robinson’s Galleria.
Cover girl si Rochelle ng magasin ngayong buwang ito kaya excited ang dating pambato ng Sex Bomb Girls nang humarap siya sa mga barakong nais magpapirma sa kanya.
Katunayan, kitang-kita ang maitim na balat ni Rochelle sa kanyang suot na bareback dress at sapatos na parehong orange ang kulay.
“Matagal na nga akong naghintay bago nag-pose ako ulit sa FHM,” say ni Rochelle sa amin. ”Kaya nagpapasalamat ako sa FHM dahil malaki ang tiwala sa akin.”
Itinanong din namin kay Rochelle ang reaksiyon niya sa patuloy daw na sumasadsad na rating ng kanyang noontime show.
Ilang linggo nang nagdesisyon ang GMA na ilipat ang naturang noontime show sa sobrang late na oras na 1:45 ng hapon dahil daw hindi ito maka-angat sa kalaban na ASAP ng ABS-CBN.
Isa si Rochelle sa mga inaasahan kung seksing sayaw ang pag-uusapan lalo na’t itinatapat siya ng Siete kay Maja Salvador ng Dos.
“Basta kami sa Sunday All-Stars, tuloy kami sa trabaho,” dagdag ni Rochelle. ”Sa akin naman, relax muna kami and at least, kahit late kami magsimula, may time kami na mag-rehearse ng mahaba.”
Bukod kay Rochelle, nagpapirma rin ng mga kopya ang ibang mga cover girl tulad nina Erika Padilla, Maica Palo, Jahziel Manabat, Abby Poblador, at Aiko Climaco.
Natuwa silang lahat dahil ito ang unang beses na maraming cover girls ang isinabak ng FHM sa nasabing autograph signing.
Abala ngayon si Aiko bilang mainstay ng Banana Nite gabi-gabi sa ABS-CBNsamantalang aktibo sa modelling sina Abby at Jahziel.
Si Erika naman ay busy pa rin sa pagiging sportscaster ng PBA at katunayan, ipapadala siya ng TV5 sa coverage ng World Youth Games sa Tsina ngayong August.
Kinompirma ni Maica na sasabak siya bilang isa sa mga kasali sa bagong season ng The Amazing Race Philippines ng TV5 ngayong Setyembre.
